完整藏文原文 · 德格版页 当前仅加载第 35 函德格 19a 版页；藏文 NFD、目录标记与异常页序保留在来源切片中，重复版页行以稳定序号区分。
རྣམས་ཀུན་ཏུ་རྒྱལ་བའི་ཡུལ་བརྗོད་ཀྱང་། །སངས་རྒྱས་གཤེགས་དང་བཞུད་པར་གྱུར་པ་མེད། །དབང་པོ་དཔལ་ཐོབ་རྣམ་ཐར་འདི་ཡིན་ནོ། །དེ་ལ་ལྷའི་རྒྱལ་པོ་རབ་འཕྲུལ་དགའི་རྣམ་པར་ཐར་པ་ནི། ཆོས་ཀྱི་རང་བཞིན་སྤྲུལ་པར་རྣམ་
D44.035.0019a01.01པར་སྒོམ་པའི་སྦྱོར་བ་ཞེས་བྱའོ། །ལྷའི་བུ་སྒྲས་ཞི་བའི་འོད་ཀྱི་རྣམ་པར་ཐར་པ་ནི། འཇིགས་པ་ཐམས་ཅད་རྣམ་པར་སྒོམ་པའི་རང་བཞིན་གྱི་སྦྱོར་བ་ཞེས་བྱའོ། །ལྷའི་བུ་སྟོབས་ཀྱིས་འཕྲུལ་པའི་སྒྲའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་གཏི་མུག་
D44.035.0019a02.01གིས་ཡོངས་སུ་མི་ཟད་ཅིང་རྨོངས་པ་མེད་པའི་དཀྱིལ་འཁོར་ཅེས་བྱའོ། །ལྷའི་བུ་དབང་ཆེན་སྣ་ཚོགས་ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་གསུང་ལ་ཡང་དག་པར་འཇུག་ཅིང་དགའ་བ་ཚད་མེད་པས་རྣམ་པར་སྨིན་པ་ཞེས་བྱའོ། །ལྷའི་བུ་དྲན་པའི་འོད་ཀྱི་
D44.035.0019a03.01རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་མཚན་ཉིད་དང་། བསོད་ནམས་ཀྱི་ཚོགས་ལ་འཇུག་པ་ཟད་མི་ཤེས་པ་ཤིན་ཏུ་བསྟན་པ་ཞེས་བྱའོ། །ལྷའི་བུ་སྤྲིན་སྒྲ་ཤིན་ཏུ་འཕགས་པའི་རྣམ་པར་ཐར་པ་ནི། འདས་པའི་བསྐལ་པ་གཅིག་ནས་གཅིག་ཏུ་བརྒྱུད་
D44.035.0019a04.01པ་རྗེས་སུ་དྲན་ཞིང་སྤྱོད་པའི་བློ་གྲོས་ཞེས་བྱའོ། །ལྷའི་བུ་སྣང་བའི་སྤྱོད་པའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཤེས་རབ་ཚད་དང་བྲལ་བ་རྟོགས་པར་བྱེད་པའི་ཡེ་ཤེས་ལ་ཡང་དག་པར་འཇུག་པ་ཞེས་བྱའོ། །ལྷའི་བུ་གཙུག་ཕུད་ཡིད་དུ་འོང་
D44.035.0019a05.01བའི་འོད་ཀྱི་རྣམ་པར་ཐར་པ་ནི། ནམ་མཁའི་དབྱིངས་ཀྱི་མཐར་ཉི་མའི་ཤུགས་ཀྱི་རྒྱུ་བས་ཀུན་ཏུ་འགྲོ་བ་ཞེས་བྱའོ། །ལྷའི་བུ་དགའ་བའི་བློ་གྲོས་ཀྱི་རྣམ་པར་ཐར་པ་ནི། བརྩམ་པ་ཐམས་ཅད་ཟད་མི་ཤེས་པ་ལ་བརྩོན་འགྲུས་ཀྱི་སྟོབས་ཡང་དག་པར་འབྱུང་བ་ཞེས་
D44.035.0019a06.01བྱའོ། །ལྷའི་བུ་མེ་ཏོག་འོད་ཀྱི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལས་ལ་ལྟ་ཞིང་བདེ་བ་དང་། སྡུག་བསྔལ་བས་ཀུན་ཏུ་རྣམ་པར་ལྟ་བ་ཞེས་བྱའོ། །ལྷའི་བུ་ཕྱོགས་ཤིན་ཏུ་སྣང་བའི་རྣམ་པར་ཐར་པ་ནི། སེམས་ཅན་གྱི་ཚོགས་
D44.035.0019a07.01