完整藏文原文 · 德格版页 当前仅加载第 36 函德格 7a 版页；藏文 NFD、目录标记与异常页序保留在来源切片中，重复版页行以稳定序号区分。
དག་པའི་བློ། །དེ་འདྲའི་བློ་ཡི་དམ་པས་ཡོངས་སུ་བསྔོ། །སངས་རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་སྟེ་ཡོངས་སུ་བསྔོ་བ་གསུམ་པའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་
D44.036.0007a01.01ཡོངས་སུ་བསྔོ་བ་བཞི་པ་ཐམས་ཅད་དུ་རྗེས་སུ་སོང་བ་ཞེས་བྱ་བ་གང་ཞེ་ན། །ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ལ་བརྩོན་པར་བྱེད་པའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། འདི་ལྟར་ཡང་དག་པའི་
D44.036.0007a02.01མཐའ་ཐམས་ཅད་རྗེས་སུ་སོང་ཞིང་དངོས་པོ་ཐམས་ཅད་ཀྱི་རྗེས་སུ་སོང་བ་དང་། འགྲོ་བ་ཐམས་ཅད་ཀྱི་རྗེས་སུ་སོང་བ་དང་། སེམས་ཅན་ཐམས་ཅད་ཀྱི་རྗེས་སུ་སོང་བ་དང་། ཞིང་ཐམས་ཅད་ཀྱི་རྗེས་སུ་སོང་བ་དང་། ཆོས་ཐམས་ཅད་ཀྱི་རྗེས་སུ་སོང་བ་དང་། ནམ་མཁའ་ཐམས་ཅད་
D44.036.0007a03.01ཀྱི་རྗེས་སུ་སོང་བ་དང་། དུས་གསུམ་ཐམས་ཅད་ཀྱི་རྗེས་སུ་སོང་བ་དང་། འདུས་བྱས་དང་། འདུས་མ་བྱས་ཐམས་ཅད་ཀྱི་རྗེས་སུ་སོང་བ་དང་། སྤྱོད་པའི་སྒྲ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ་དགེ་བའི་རྩ་བ་འདི་ཡང་དུས་གསུམ་གྱི་སངས་རྒྱས་སྐྱེ་བ་ཐམས་ཅད་དུ་
D44.036.0007a04.01རྒྱས་པར་ཁྱབ་པར་གྱུར་ཅིག །འདས་པའི་དུས་ཀྱི་སངས་རྒྱས་ཐམས་ཅད་མཆོད་ཅིང་བསྙེན་བཀུར་བའི་རྒྱུར་གྱུར་ཅིག །མ་འོངས་པའི་དུས་ཀྱི་སངས་རྒྱས་ཐམས་ཅད་ཀྱི་སྨོན་ལམ་ཡོངས་སུ་རྫོགས་པའི་རྒྱུར་གྱུར་ཅིག །ད་ལྟར་བྱུང་བའི་དུས་ཀྱི་འཇིག་རྟེན་གྱི་ཁམས་ནམ་མཁའི་དབྱིངས་
D44.036.0007a05.01ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ། ལྷ་རྫས་དང་། ལྷ་རྫས་མ་ཡིན་པའི་རིམ་གྲོ་འབྱམ་ཀླས་པ་དང་ལྡན་པ། སངས་རྒྱས་ཐམས་ཅད་མངོན་དུ་གྱུར་པའི་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་གྱི་རྒྱན་གྱི་དེ་བཞིན་གཤེགས་པ་ཐམས་ཅད་ཀྱི་
D44.036.0007a06.01རྒྱན་རྣམ་པར་བཀོད་པའི་རྒྱུར་གྱུར་ཅིག །བློ་བདག་ཉིད་ཆེ་བ་ལ་མོས་ཤིང་ཤིན་ཏུ་ཡངས་པའི་དོན་དུ་བསྒྲིབས་པ་མེད་པའི་དགེ་བའི་རྩ་བ་ཐམས་ཅད་རྒྱ་ཆེར་ཡོངས་སུ་བསྔོ་བའི་ཕྱིར། འཇིག་རྟེན་གྱི་ཁམས་མཐའ་དང་དབུས་མེད་པ་ཐམས་ཅད་སེམས་བསྐྱེད་པས་རྒྱས་པར་གྱུར་ཅིག །
D44.036.0007a07.01