德格《甘珠尔》D6

དེ་དག་གིས་གཙེས་པ་དང་། སྨྲས་པ། འཕགས་པ་བདག་ནི་ཁུར་མཁན་ཡང་མ་ལགས་ཤ་གཡོས་མཁན་ཡང་མ་ལགས་པས། དབྱིག་འདི་སྣོམས་ཏེ་བཞུད་ལ་གང་ཞིག་གང་བཞེད་པ་དེས་དེ་བགྱིད་དུ་སྩོལ་ཅིག །དེ་དག་གིས་སྨྲས་པ། བཞིན་{བཟངས་,བཟང་}

བཅོམ་ལྡན་འདས་ཀྱིས་དབྱིག་མ་གནང་ངོ་། །དེས་སྨྲས་པ། འཕགས་པ་བདག་ནི་སྤོས་འཚོང་སྟེ་ཚོང་འདུས་ཀྱིས་འཚོ་བ་ལགས་ན། དེ་ལྟ་ན་བདག་གི་འཚོ་བ་འཆད་པར་འགྱུར་རོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་

སྩལ་པ། །སྦྱིན་བདག་ལ་ཡིད་བརྟན་ཏེ་ཀཱར་ཥཱ་པ་ཎ་དག་བླངས་ནས་ཅི་འདོད་པར་ཡོངས་སུ་སྤྱད་པར་བྱ་སྟེ། འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །དྲུག་སྡེ་རྣམས་ཁྱིམ་པ་དག་དང་ལྷན་ཅིག་སྟན་གཅིག་ལ་འདུག་པ་བྲམ་ཟེ་དང་། ཁྱིམ་བདག་དད་པ་ཅན་དག་གིས་མཐོང་

ནས་འཕྱ་བར་བྱེད་ཅིང་། འཕགས་པ་ཁྱེད་རབ་ཏུ་བྱུང་བ་ཚངས་པར་སྤྱོད་པ་ཡིན་ན། ཇི་ལྟར་འདོད་པའི་ལོངས་སྤྱོད་སྤྱོད་པ་འདི་དག་དང་ལྷན་ཅིག་སྟན་གཅིག་ལ་འདུག་ཅེས་བྱས་པ་དང་། དེ་དག་ཅང་མི་ཟེར་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་། ཁྱིམ་བདག་དད་པ་ཅན་དག་འཕྱ་བ་ནི་ཐོག་ཏུ་བབ་བོ། །དེ་ལྟ་བས་ན་དགེ་སློང་དག་གིས་ཁྱིམ་པ་དག་དང་ལྷན་ཅིག་སྟན་གཅིག་ལ་འདུག་པར་མི་བྱ་སྟེ། འདུག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་

ཀྱིས་ཁྱིམ་པ་དག་དང་ལྷན་ཅིག་སྟན་གཅིག་ལ་འདུག་པར་མི་བྱའོ་ཞེས་བཀའ་སྩལ་པ་དང་། དགེ་ཚུལ་དག་དང་ལྷན་ཅིག་སྟན་གཅིག་ལ་འདུག་པ་དགེ་བསྙེན་དག་གིས་མཐོང་ནས་སྨྲས་པ། འཕགས་པ་ཁྱེད་ནི་བསྙེན་པར་རྫོགས་པ་ལགས་ན། ཇི་ལྟར་དགེ་ཚུལ་དག་དང་ལྷན་ཅིག་སྟན་

གཅིག་ལ་བཞུགས་དེ་དག་གིས་སྨྲས་པ། ཚེ་དང་ལྡན་པ་དག་འདི་དག་ནི་ཁྱིམ་པ་མ་ཡིན་ཏེ། འདི་དག་དགེ་སྦྱོང་ཡིན་ན་འདི་ལ་འགལ་བ་ཅི་ཞིག་ཡོད། དེ་དག་ཅང་མི་སྨྲ་བར་འདུག་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་