德格《甘珠尔》D724

མཉམ་པར་བྱ། །དེ་ནས་ཕྲེང་ལ་ཡོངས་སུ་བཟླས། །མཚན་མོ་དེ་ཉིད་དུ་འཁོད་དེ། །ཀུ་ཤ་བཏིང་བའི་ས་གཞི་ལ། །སྔགས་ཤེས་དེར་ནི་ཉལ་བར་བྱ། །རྨི་ལམ་གང་དང་གང་མཐོང་བ། །དགེ་བའི་རྨི་ལམ་མཐོང་ན་ནི། །རྨི་ལམ་ངེས་པར་བསྟན་པ་

ཡིན། །དངོས་གྲུབ་དེ་ཡིས་བསྒྲུབ་པར་བྱ། །སངས་རྒྱས་ཉན་ཐོས་བསེ་རུ་རྣམས། །གལ་ཏེ་རྨི་ལམ་མཐོང་གྱུར་ན། །སྔགས་པས་འབྲས་བུ་བཅས་པར་འགྲུབ། །ངེས་པར་དེ་ཡི་ཆོ་ག་བྱ། །དགེ་སློང་གཟུགས་དང་བྲམ་ཟེ་ཡི། །གཟུགས་བརྙན་སྣ་ཚོགས་མཛེས་པ་མཐོང་། །

གལ་ཏེ་རྨི་ལམ་དེ་མཐོང་ན། །ཕྲེང་བ་དབུལ་བྱ་དེ་བཞིན་དུ། །སྔགས་ཀྱི་དོན་ཀུན་སྒྲུབ་པ་པོ། །དེ་བཞིན་གདོན་མི་ཟ་བར་འགྲུབ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་

བའི་རྟོག་པ་ལས། རས་རིས་བར་མའི་ཆོ་ག་རབ་འབྱམ་ལས་བཅུ་པ་བགྲང་ཕྲེང་གི་ཆོ་གའི་ལེའུ་རབ་འབྱམ་རྫོགས་སོ།། །།དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་སླར་ཡང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ཆེན་པོ་ལ་གཟིགས་ནས་བྱང་ཆུབ་སེམས་

དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སེམས་དཔའ་ཆེན་པོ་ཁྱོད་ཀྱི་རིག་པའི་སྔགས་ཀྱི་ལེའུ་རྫོགས་པའི་ཁྱད་པར་གྱི་ཆོ་ག་དང་། སྦྱིན་སྲེག་གི་ལས་རབ་ཏུ་སྦྱོར་བའི་རིག་པའི་སྒྲུབ་པ་ཡོད་དེ། མེ་ལ་ཉེ་བར་སྤྱོད་པའི་ཁྱད་པར་གྱི་ཆོ་ག་ལས་

གང་དུ་རིག་པའི་སྤྱོད་པ་ལ་མངོན་པར་བརྩོན་པའི་སེམས་ཅན་རྣམས་རབ་ཏུ་སྦྱོར་ཞིང་གནས་པར་འགྱུར་བ་དེ་གང་ཞེ་ན། རིག་པའི་སྔགས་ཀྱི་ཚོགས་གསང་ཆེན་ནི། ཏདྱ་ཐཱ། ཨོྃ་ཏིཥྛ་ཧ་རི་པིངྒ་ལེ། ཧི་རཀྵ་དི་ཧི་ད་དཱ་དཱི་པཱ་ཡ་ཧཱུྃ་ཕཊ་ཕཊ་སྭཱ་ཧཱ། སྤྱན་རས་གཟིགས་དབང་ཕྱུག་འདི་ནི་

མཆོག་གི་སྙིང་པོ་ལས་ཐམས་ཅད་བྱེད་པ། འདོད་པ་ཐམས་ཅད་སྟེར་བའོ། །དང་པོ་རེ་ཞིག་སྒྲུབ་པ་པོས་མེའི་སྙིང་པོ་འདི་ལན་ཅིག་བཟླས་པས། མར་གྱི་སྲེག་བླུགས་གསུམ་མེ་ལ་སྦྱིན་སྲེག་བྱ་སྟེ་མེ་ལྷ་སྤྱན་དྲངས་པར་འགྱུར་རོ། །དེ་བཞིན་དུ་རབ་ཏུ་སྦྱར་ཏེ། ཞི་བ་