完整藏文原文 · 德格版页 当前仅加载第 7 函德格 34a 版页；藏文 NFD、目录标记与异常页序保留在来源切片中，重复版页行以稳定序号区分。
མོས་ཚལ་འདི་སུའི། ཀུན་དགའ་ར་བ་འདི་སུའི། ཁྲོན་པ་འདི་སུའི། ཞིང་འདི་སུའི། བ་ལང་འདི་དག་སུའི། མ་ཧེ་འདི་དག་སུའི་ཞེས་འདུ་འཛིའི་གཏམ་གྱིས་འདུག་གོ། །དེ་དག་གིས་ཀྱང་བསམས་པ། སློབ་དཔོན་འཆར་ཀ་ཡུན་རིང་དུ་ཐོགས་པར་འགྱུར་རོ་
D3.007.0034a01.01སྙམ་ནས་དེ་དག་གིས་གཅིག་ལ་གཅིག་ཞུས་ཏེ། ཚེ་དང་ལྡན་པ་འཆར་ཀའི་མལ་བཤམས་ནས། རྐང་པའི་ཆུ་དང་། རྐང་པ་བསྐུ་བ་མཐའ་གཅིག་ཏུ་བཞག་སྟེ་གཅིག་ལ་གཅིག་སྨྲས་པ། ཚེ་དང་ལྡན་པ་དག་ད་ལྟར་གྲང་བའི་དུས་ལ་བབ་ཀྱིས་བདག་ཅག་མེ་ཁང་དུ་ཞུགས་ཏེ་ཉལ་ལོ་ཞེས་
D3.007.0034a02.01དེ་དག་མེ་ཁང་དུ་ཞུགས་ཏེ་ཉལ་ལོ། །ཚེ་དང་ལྡན་པ་འཆར་ཀ་ཡང་ཇི་སྲིད་དུ་དེའི་འདུ་འཛིའི་གཏམ་གྱི་ཟླ་ཡོད་པ་དེ་སྲིད་དུ་འདུག་འདུག་ནས་གང་གི་ཚེ་དེའི་འདུ་འཛིའི་གཏམ་གྱི་ཟླ་མེད་པ་དེའི་ཚེ་ན་མིག་ལམ་ཆད་པའི་དུས་ཀྱི་ཚེ་གཙུག་ལག་ཁང་དུ་འོངས་ཏེ་ཚེ་དང་ལྡན་པ་དག་ཚེ་དང་ལྡན་པ་དག་
D3.007.0034a03.01ཅེས་བོད་པར་བརྩམས་པ་དང་། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འཆར་ཀ་འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། འཆར་ཀས་སྨྲས་པ། འདི་ན་ཁོ་བོའི་གཞོན་ནུ་དག་ཅིག་འཁོད་ན་དེ་དག་ལས་འགའ་ཞིག་ན་བར་མ་གྱུར་ཏམ། དེ་དག་
D3.007.0034a04.01གིས་དེ་ཐོས་ནས་སྨྲས་པ། སློབ་དཔོན་མ་འབོད་ཅིག །གནས་ཁང་འོ་ནིར་གཟིམས་མལ་བཤམས་ཏེ་ཞབས་ཀྱི་ཆབ་དང་། ཞབས་བསྐུ་བ་ཡང་བཞག་གིས་དེར་གཟིམས་ཤིག །བདག་ཅག་ད་ལྟར་གྲང་བའི་དུས་ལ་བབ་པས་མེ་ཁང་དུ་ཞུགས་ཏེ་མཆིས་ཉལ་ལོ། །ཚེ་དང་ལྡན་
D3.007.0034a05.01པ་དག་ཁྱེད་ཅག་གལ་ཏེ་ཁྲག་ནད་དམ། མཁྲིས་ནད་གཡོས་པར་གྱུར་ན་ཁོ་བོས་ཡུན་དེ་སྲིད་དུ་ཁྱེད་ཀྱི་ནད་གཡོག་བྱེད་པར་ག་ལ་ནུས་ཕྱིར་བྱུང་ཤིག་ཅེས་དེས་དེ་དག་བླ་གབ་མེད་པར་བཏོན་ཏེ་ཆུ་གྲང་མོས་བཏབ་ནས་མཚན་ཐོག་ཐག་བསིལ་ཡབ་ཀྱིས་གཡབས་སོ། །དེ་དག་གིས་མཚན་མོའི་
D3.007.0034a06.01ནམ་ནངས་ནས་སྨྲས་པ། སློབ་དཔོན་ཕྱག་འཚལ་ལོ། །བདག་ཅག་མཆིའོ། །གར་འདོང་། མཉན་ཡོད་དུའོ། །སྡོད་ཅིག་དང་ཁོ་བོས་ཁྱེད་ཅག་ན་བ་རྣམས་ཀྱི་ནད་གཡོག་བྱའོ། །སློབ་དཔོན་ཁྱེད་ཀྱིས་ཁོ་བོ་ཅག་མི་ན་བ་ཡང་ན་བར་བྱས་པས་ན་བ་རྣམས་ཀྱི་ནད་གཡོག་བྱས་རེ་སྐན་ཞེས་དེ་དག་
D3.007.0034a07.01