完整藏文原文 · 德格版页 当前仅加载第 89 函德格 234b 版页；藏文 NFD、目录标记与异常页序保留在来源切片中，重复版页行以稳定序号区分。
སྨོན་ལམ་ཚད་མེད་འགྲུབ། །གང་ཞིག་དབྱངས་ཅན་མངོན་མཆོད་དམ། །ཡང་ན་སློབ་མས་མན་ངག་བཞིན། །ལུང་བཞིན་ཆོས་དེ་གང་སྒྲུབ་པ། །བཀུར་སྟིའི་མཆོག་རྣམས་ཐོབ་པར་འགྱུར། །གང་ཞིག་ཡེ་ཤེས་མཆོག་སྒྲུབ་པའང་། །རྩེ་གཅིག་སེམས་ཀྱིས་ཆོས་འདི་
D556.089.0234b01.01གཟུང་། །བསོད་ནམས་ཡེ་ཤེས་ཚོགས་འཕེལ་ཞིང་། །ངེས་པར་འགྲུབ་ལ་ཡིད་གཉིས་སྤོངས། །གང་ཞིག་ནོར་སྒྲུབ་ནོར་དང་ལྡན། །ཁེ་དང་གྲགས་པའང་དེ་བཞིན་འགྲུབ། །འབྱུང་བར་འདོད་པའང་རྣམ་གྲོལ་བར། །ངེས་པར་འགྲུབ་པས་ཡིད་གཉིས་སྤོངས། །
D556.089.0234b02.01ཡོན་ཏན་མང་པོ་ཚད་མེད་པའང་། །བསམ་པ་བཞིན་དུ་ཀུན་གྲུབ་པས། །འདི་ལ་ཚུལ་བཞིན་གང་གནས་པ། །ངེས་པར་འགྲུབ་པས་ཡིད་གཉིས་སྤོངས། །དབེན་པར་གཙང་མའི་གོས་གྱོན་ཏེ། །དཀྱིལ་འཁོར་ཅི་རན་བྱས་པ་དེར། །བུམ་པ་རྒྱས་པ་བཞི་བཞག་
D556.089.0234b03.01སྟེ། །དུས་བཞིན་མེ་ཏོག་བདུག་པས་མཆོད། །བ་དན་གདུགས་དང་ལྡ་ལྡི་བྲེ། །ཕྱེ་མ་བྱུག་པས་རྒྱས་པར་བརྒྱན། །སངས་རྒྱས་དང་ནི་དབྱངས་ཅན་མཆོད། །ལྷ་དེ་མཐོང་འདོད་མཐོང་བར་འགྱུར། །དབྱངས་ཅན་ལྷ་མོ་དེ་མདུན་དུ། །ཞག་བདུན་གསུམ་དུ་
D556.089.0234b04.01བཟླས་བརྗོད་དེ། །གལ་ཏེ་ལྷ་དེ་མ་མཐོང་ན། །བསམ་པ་བརྟན་པས་ཞག་དགུར་བཟླས། །དེ་ཡི་ནུབ་མོའང་མ་མཐོང་ན། །གཞན་དུ་ཤིས་པའི་གནས་བཙལ་ཏེ། །ཚུལ་བཞིན་ལྷ་མོའི་གཟུགས་བྲིས་ལ། །མཆོད་ཅིང་བཟླས་བརྗོད་རྒྱུན་མི་གཅད། །
D556.089.0234b05.01བདག་དང་གཞན་དོན་ཚད་མེད་ལ། །ཉིན་མཚན་རྒྱུན་ཏུ་བརྩོན་བསྐྱེད་དེ། །དེ་ཡི་འབྲས་བུ་གཞན་ལ་སྟོབས། །དེ་ནི་བསམ་པ་འགྲུབ་པར་འགྱུར། །དེ་སྟེའང་བསམ་པ་མ་གྲུབ་ན། །ཟླ་བ་གསུམ་དང་དྲུག་དང་དགུ། །ཡང་ན་བརྩོན་པས་ལོར་བཟླས་ན། །
D556.089.0234b06.01མངོན་ཤེས་དྲུག་ལ་སོགས་པའང་འཐོབ། །དེ་ནས་བྲམ་ཟེ་ཀཽཎྜི་ནྱས། དེ་སྐད་ཅེས་བཤད་པ་ཐོས་ནས་དགའ་བ་དང་། རངས་པ་ཚད་མེད་པ་སྐྱེས་ཏེ། འཁོར་འདུས་པ་དེ་དག་ལ་འདི་སྐད་ཅེས་སྨྲས་སོ། །ལྷ་དང་མི་ལ་སོགས་པའི་འཁོར་ཐམས་ཅད་ཀྱིས།
D556.089.0234b07.01