'phags pa snying rje chen po'i pad ma dkar po zhes bya ba theg pa chen po'i mdo/
当前为德格木刻版 81b。藏文 NFD 原样保留，并提供可引用的稳定行号。
- 本页内容
- 藏文原典 · 德格版页
- 德格版页
- 81b
- 可引用原文
- 7 行
- 全文规模
- 全经 1022 稳定行段
- 责任者
- 藏译责任依各经题记；本批次未逐条裁决
- 正文语种
- 藏文
- 权利
- Public Domain；保留固定提交、版本边界与来源署名
函页目录第 50 函 · 德格 81b
选一句，查术语、看异译、问含义或带走引用。选中任意经文，系统会按完整稳定行段取文；问经时不会暗中换经。
我的选文བརྩམས་ནས་ཅི་ནས་ཀྱང་སྲོག་ཆགས་བརྒྱ་ཕྲག་མང་པོ་དང་སྲོག་ཆགས་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དང་། ལྷ་དང་མིར་བཅས་པའི་སྐྱེ་དགུ་དུལ་བར་འགྱུར་བ་དེ་ལྟ་དེ་ལྟར་དགེ་སློང་བྱེ་བ་དགུ་བཅུ་རྩ་དྲུག་པོ་དེ་དག་ལ་ཆོས་སྟོན་པར་འགྱུར་རོ། །ཀུན་དགའ་བོ་དགེ་སློང་འོད་སྲུང་ཇི་ལྟར་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་ལ་ལྟོས། ཀུན་དགའ་བོ་ཁྱོད་ཀྱང་སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་ཞུགས་སོ། །འཇུག་པར་ཡང་འགྱུར་རོ། །ཀུན་དགའ་བོ་དེ་ལྟར་ན་དགེ་སློང་འོད་སྲུང་དང་ཁྱོད་གཉིས་ལོ་བཞི་བཅུ་ལྷག་ཙམ་དུ་ངའི་དམ་པའི་ཆོས་
འདི་འཛིན་པར་འགྱུར། ཆོ་འཕྲུལ་དང་བཅས་པའི་ཚངས་པར་སྤྱོད་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་གྱུར་པ་སྤྱོད་པར་འགྱུར་རོ། །འོད་སྲུང་གི་ལེའུ་སྟེ་ལྔ་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་མྱ་ངན་མ་བྱེད་ཅིག་ཅེས་བྱ་བ་ནས་རྒྱས་པར་ཀུན་དགའ་བོ་ཁྱོད་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པར་གྱུར་པ། ལྷ་དང་མི་རྣམས་ལ་རྒྱ་ཆེ་ཞིང་ཡངས་པ་དང་། ཡང་དག་པར་མནོས་པ་སྤྱོད་པར་འགྱུར་རོ་ཞེས་བྱ་བའི་བར་དུའོ། །ཀུན་དགའ་བོ་ང་འདས་ཤིང་ང་ཡོངས་སུ་མྱ་ངན་ལས་འདས་ནས་
གྲོང་ཁྱེར་བཅོམ་བརླག་ན་རི་སྤོ་དང་ངོས་ཆེ་བ་ཞེས་བྱ་བ་ཡོད་པར་འགྱུར་རོ། །དེ་ན་དགེ་འདུན་གྱི་ཀུན་དགའ་ར་བ་འདམ་བུ་ཅན་ཞེས་བྱ་བ་ཞིག་ཡོད་པར་འགྱུར་ཏེ། དེ་ན་ཡུལ་སླན་པ་ཞེས་བྱ་བའི་དགེ་སློང་རྫུ་འཕྲུལ་ཆེ་བ། མཐུ་ཆེ་བ། གསལ་བ། དུལ་བ། འཇིགས་པ་མེད་པ། མང་དུ་ཐོས་པ།མདོ་འཛིན་པ། འདུལ་བ་འཛིན་པ། མ་མོ་འཛིན་པ། ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་སྟོད་པ། ཡང་དག་པར་རབ་ཏུ་དགའ་བར་བྱེད་པ། ཚངས་པ་མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་པ་ཞིག་འབྱུང་བར་འགྱུར་ཏེ།
དེ་ཡང་ཚངས་པར་སྤྱོད་པ་འདི་ཆོ་འཕྲུལ་དང་བཅས་པ་དང་ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་བྱེད་པར་འགྱུར་གྱིས། ཀུན་དགའ་བོ་ཁྱོད་མྱ་ངན་མ་བྱེད་སྨྲེ་སྔགས་མ་འདོན་ཅིག །ཀུན་དགའ་བོ་ང་འདས་ནས་རི་སྤོ་དང་ངོས་ཆེ་བ་དེ་ཉིད་ན་དགེ་འདུན་གྱི་ཀུན་དགའ་ར་བ་འདམ་བུ་ཅན་ཞེས་བྱ་བ་དེ་ཉིད་
版本与引用信息
母版来自 Esukhia Digital Derge Kangyur。本页仅重组显示层；藏文 NFD、德格木刻版页与稳定行号均未改动。权利说明：Public Domain；保留固定提交、版本边界与来源署名。
- 目录
- 德格目录 D111
- 德格版页
- 81b
- 显示
- 忠实保留藏文原典·未添加机器译文
研究边界
书目关系边界：BDRC WA0RK0111 作为固定目录作品链接候选；同一链接下的多个德格编号保留为不同文本表达，不进行未经复核的跨传统合并。
归属边界：《甘珠尔》规范位置不自动证明每一项是佛陀逐字亲说；说者、作者、译者和编集责任等待逐条审计。