德格《甘珠尔》D724

བཀླགས་པས་འགྲུབ་པར་འགྱུར་རོ། །ཆོ་ག་འདི་ལ་ཡང་རིག་པ་སྒྲུབ་པར་འདོད་པས་རིག་པ་དེས་བ་བྱུང་ལྔས་ལུས་ཀུན་ཏུ་སྦྱངས་ནས་དཀར་པོའི་ཚེས་གཅིག་ནས་བརྩམས་ཏེ་ཇི་སྐད་བཤད་པའི་རྣམ་པས་ཐུན་གསུམ་དུ་སྟོང་ཕྲག་བརྒྱད་བཟླས་པར་བྱའོ། །ཇི་སྲིད་

དུ་ཟླ་བ་ཉ་ལ་འབུམ་ཡང་རུང་ངོ་། །སྔོན་དུ་བསྙེན་པ་བྱས་པར་འགྱུར་རོ། །དེ་ནས་མཐར་ཉིན་མཚན་དུ་སྨྱུང་བར་གནས་པས་མཆོད་པ་རྒྱ་ཆེན་པོ་བྱས་ནས་ཨ་ག་རུ་ནག་པོའི་ཡམ་ཤིང་སོར་དྲུག་པའི་ཚད་ལ་ཞོ་དང་སྦྲང་རྩི་དང་མར་གྱིས་བཏགས་པའམ། ཏུ་རུཥྐའི་ཏིལ་མར་

གྱིས་བཏགས་པའི་སེང་ལྡེང་གི་མེ་ལ་སྟོང་ཕྲག་བརྒྱད་སྦྱིན་སྲེག་བྱའོ། །ལས་ཐམས་ཅད་ནུས་པར་འགྱུར་རོ། །དེ་ནས་ལས་སུ་འགྱུར་ཏེ་མཐར་མཚན་མོ་གསུམ་དུ་སྨྱུང་བར་གནས་པ། གཞོན་ནུ་མས་བཀལ་བའི་སྐུད་པ་རིང་བསྲེལ་དང་བཅས་པའི་མཆོད་རྟེན་དུའམ།

སོ་སོའི་ཁྱིམ་དུ་སྟོང་ཕྲག་བཅུར་མངོན་པར་བསྔགས་ནས་ལག་པ་ལ་བཅིངས་ན་མི་སྣང་བར་འགྱུར་རོ། །རིང་བསྲེལ་དང་བཅས་པའི་མཆོད་རྟེན་དུ་རས་རིས་བཞུགས་སུ་གསོལ་ནས་པདྨ་སྟོང་ཕྲག་སུམ་ཅུ་སེང་ལྡེང་གི་སོལ་བས་མེ་སྦར་ནས་སྦྱིན་སྲེག་བྱས་ན་རང་གི་གཟུགས་ཀྱི་ལྷ་མོ་མཐོང་

ངོ་། །གང་བསླངས་པ་དེ་རྙེད་དོ། །ཚེས་གཅིག་ནས་བརྩམས་ཏེ་ཇི་སྲིད་{བཅྭོ་,བཅོ་}ལྔ་ལ་མཚན་མོ་གསུམ་དུ་སྨྱུང་བར་གནས་པས་རིང་བསྲེལ་དང་བཅས་པའི་མཆོད་རྟེན་ལ་མཆོད་པ་རྒྱ་ཆེན་པོ་བྱས་ནས་ཨུ་དུམ་བཱ་རའི་ཡམ་ཤིང་གིས་མེ་སྦར་ནས་མར་གྱི་སྲེག་བླུགས་སྟོང་སྦྱིན་སྲེག་བྱས་ན་གྲོང་རྙེད་དོ། །

རྒྱ་མཚོར་འགྲོ་བའི་ཆུ་ཀླུང་དུ་མཆོད་རྟེན་སྟོང་བྱེད་དུ་གཞུག་གོ། །ཉི་མ་སོ་སོ་རེ་རེ་ལ་མཆོད་རྟེན་ལ་སྟོང་ཕྲག་བརྒྱད་མངོན་པར་བསྔགས་པས་དྲི་དང་མེ་ཏོག་ལ་སོགས་པ་འདི་ལ་ཕུལ་ནས་ཇི་སྲིད་དུ་མཆོད་རྟེན་ཕྱི་མ་འབར་བ་དེ་ནས་བཅོམ་ལྡན་འདས་བྱོན་པར་ཤེས་པར་བྱའོ། །བཅོམ་ལྡན་

འདས་བྱོན་པ་ན་ས་གཡོ་བ་དང་དྲི་ཞིམ་པོའི་རླུང་ལྡང་སྟེ། ཇི་སྲིད་དུ་རང་གི་གཟུགས་ཀྱིས་ཉེ་བར་གནས་པ་དེ་སྲིད་དུ་བཟླས་པར་བྱའོ། །མཆོག་གང་སློང་བའི་མཆོག་སྩོལ་བར་མཛད་དོ། །བཅོམ་ལྡན་འདས་ཀྱི་སྤྱན་སྔར་སེང་ལྡེང་གི་འདབ་མའི་དུམ་བུའི་སྦྱིན་སྲེག་སྟོང་ཕྲག་བརྒྱད་བྱའོ། །