完整藏文原文 · 德格版页 当前仅加载第 95 函德格 291a 版页；藏文 NFD、目录标记与异常页序保留在来源切片中，重复版页行以稳定序号区分。
འདས་རྣམས་ཀྱི་སོ་སོ་རང་གི་རིག་པའི་ཡེ་ཤེས་ཀྱི་དབྱིངས་མཉམ་པ་ཉིད་ཀྱིས་མི་མཉམ་པ་དང་མཉམ་པ། རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ལ་སྦྱར་བ་དང་། ཡང་དག་པར་འཛིན་དུ་འཇུག་པ་དང་། ཡང་དག་པར་
D751.095.0291a01.01གཟེངས་སྟོད་པ་དང་། ཡང་དག་པར་རབ་ཏུ་དགའ་བར་བྱེད་པ་དང་། དགའ་བ་དང་། དང་བ་དང་། མགུ་བའི་ས་ལ་ཡང་དག་པར་གཟུད་པ་དང་། ཆོས་རྟོགས་པའི་ཁྱད་པར་བརྗོད་པ་དང་། རྒྱ་མཚོ་ཆེན་པོ་ལྟར་འདུལ་བའི་སེམས་ཅན་ཡོངས་སུ་སྨིན་པར་བྱ་བའི་
D751.095.0291a02.01དུས་དང་། ཚོད་ལས་མི་འདའ་བར་བྱ་བ་དང་། དེ་དག་ལ་རྒྱུ་དེའི་དབང་དུ་བྱས་ཏེ་སྐྱེ་བོའི་ཚོགས་ཆེན་པོའི་དོན་དང་། ཕན་པ་དང་། བདེ་བ་དང་། ལྷ་དང་། མི་རྣམས་ཀྱི་དོན་དང་། ཐེག་པ་ཆེན་པོ་བླ་ན་མེད་པའི་ཆོས་ཀྱི་ཚུལ་གཅིག་ནས་གཅིག་ཏུ་བརྒྱུད་དེ་གནས་པར་བྱ་བ་དང་།
D751.095.0291a03.01གཅིག་ནས་གཅིག་ཏུ་ལུང་བྱིན་པས་ཐོས་པ་དང་། བསམ་པ་དང་། བསྒོམ་པ་ལས་བྱུང་བའི་ཤེས་རབ་དང་། ཡེ་ཤེས་གོམས་པ་རྣལ་འབྱོར་དུ་གྱུར་པའི་རྒྱུད་ཀྱི་རྒྱུན་མི་གཅད་པ་དང་། སྐལ་བ་ཡོད་ལ་ཡོངས་སུ་མ་སྨིན་པ་ཡོངས་སུ་སྨིན་པར་བྱ་བའི་འོས་སུ་གྱུར་པའི་དོན་གྱི་
D751.095.0291a04.01ཕྱིར་ཕྱོགས་ཙམ་གྱི་སྒོ་གཅིག་མདུན་དུ་བྱས་ཏེ་འཇུག་པར་བྱེད་པ་{ཆུང་ཟད་,ཅུང་ཟད་}ཅིག་བཤད་པར་བྱའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤ་ར་དྭ་ཏིའི་བུ་མཆོག་ཏུ་ངོ་མཚར་དུ་གྱུར་ཅིང་རྨད་དུ་བྱུང་བར་གྱུར་ཏེ་དགའ་བ་ཐོབ་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །
D751.095.0291a05.01རིགས་ཀྱི་བུ་ལེགས་སོ་ལེགས་སོ། །གང་གི་ཕྱིར་ཁོ་བོ་ཅག་ལྟ་བུ་ཉི་ཚེ་བའི་ཤེས་པ་དང་ལྡན་པ་གཞན་གྱིས་སྒྲ་བསྒྲགས་པའི་རྗེས་སུ་འགྲོ་བའི་ཉན་ཐོས་རྣམས་ལ་(ཆེས་,ཆོས་)ཟབ་མོའི་ཚིག་དོན་འདི་ལྟ་བུ་གསལ་བར་བྱས་པ་ནི་རིགས་ཀྱི་བུ་ཁྱོད་ཡང་ལེགས་སོ། །ལག་ན་རྡོ་རྗེས་སྨྲས་
D751.095.0291a06.01པ། བཙུན་པ་ཤ་ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །བཙུན་པ་ཤ་ར་དྭ་ཏིའི་བུ་ཏིང་ངེ་འཛིན་འདིའི་མིང་ཅི་ཞེས་བྱ་ཞེས་དེ་སྐད་ཟེར་བ་ནི་ཏིང་ངེ་འཛིན་འདིའི་མིང་རྡོ་རྗེའི་རྣམ་པར་ཐར་པའི་སྒོ་ཆེན་པོ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཕྱག་གཡས་པ་
D751.095.0291a07.01