完整藏文原文 · 德格版页 当前仅加载第 44 函德格 135a 版页；藏文 NFD、目录标记与异常页序保留在来源切片中，重复版页行以稳定序号区分。
རྒྱ་མཚོ་ཆེན་པོ་བཞི་ལས། ཆུ་ཐིགས་པ་གཅིག་བླངས་པ་དེ་བཞིན་དུ་འོད་སྲུང་ཉན་ཐོས་ཀྱི་དགེ་བའི་རྩ་བ་མངོན་པར་འདུས་བྱས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཆུ་ཡི་ཕུང་པོ་དེ་ལས་ནི། །སྐྲ་ཚལ་བརྒྱ་ཡི་རྩེ་མོས་ཐིགས་བླངས་
D87.044.0135a01.01པ། །དེ་བཞིན་ཉན་ཐོས་རྣམས་ཀྱིས་དགེ་བྱས་པའི། །དགེ་བ་དག་དང་ལྡན་པར་བལྟ་བར་བྱ། །འོད་སྲུང་འདི་ལྟ་སྟེ། དཔེར་ན་ཡུངས་འབྲུ་སྲིན་བུས་ཟོས་པའི་ནང་གི་ནམ་མཁའ་བཞིན་དུ་ཉན་ཐོས་ཀྱི་འདུས་མ་བྱས་ཤེས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་
D87.044.0135a02.01ན་ཡུངས་འབྲུ་སྲིན་བུས་ཟོས་པ་ཡི། །ནང་གི་ནམ་མཁའ་དེ་ནི་ཆུང་བ་ཡིན། །ཉན་ཐོས་འདུས་མ་བྱས་པ་ཤེས་པ་ཡང་། །དེ་བཞིན་ཆུང་ཞིང་ཤིན་ཏུ་ཆུང་བར་བལྟ། འོད་སྲུང་འདི་ལྟ་སྟེ། དཔེར་ན་ཕྱོགས་བཅུའི་ནམ་མཁའི་ཁམས་བཞིན་དུ་བྱང་ཆུབ་སེམས་དཔའི་འདུས་
D87.044.0135a03.01མ་བྱས་ཤེས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཕྱོགས་བཅུའི་འཇིག་རྟེན་ཐམས་ཅད་ན། །ནམ་མཁའི་ཁམས་ནི་སྒྲིབ་པ་མེད་པར་འདུག །བྱང་ཆུབ་སེམས་དཔའི་འདུས་མ་བྱས་ཤེས་པ། །འགྲོ་བ་ཀུན་གྱི་མཆོག་ཀྱང་དེ་ལྟར་བལྟའོ། །འོད་སྲུང་འདི་
D87.044.0135a04.01ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བཙུན་མོ་དམ་པ་སྐྱེས་པ། དབུལ་པོ་དང་ཉལ་ནས་ཕྱིས་དེ་ལ་བུ་བྱུང་བར་གྱུར་ན། འོད་སྲུང་འདི་ཇི་སྙམ་དུ་སེམས། དེ་རྒྱལ་པོའི་བུ་ཞེས་བྱའམ། གསོལ་པ། བཅོམ་ལྡན་འདས་དེ་ནི་མི་འགྱུར་ལགས་སོ། །བཅོམ་ལྡན་
D87.044.0135a05.01འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ངའི་ཉན་ཐོས་རྣམས་ཆོས་ཀྱི་དབྱིངས་ལས་སྐྱེས་མོད་ཀྱི། དེ་དག་དེ་བཞིན་གཤེགས་པའི་སྲས་དབང་བསྐུར་བའི་འོས་ཞེས་མི་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་རྒྱལ་པོའི་བཙུན་མོ་ཡིད་འོང་བ། །སྐྱེས་པ་དབུལ་པོ་དང་
D87.044.0135a06.01ནི་ཉལ་གྱུར་ཏེ། །དེ་ཕྱིར་དེ་ལ་བུ་བྱུང་གང་ཡིན་པ། །དེ་ནི་རྒྱལ་པོའི་བུ་མིན་དབང་བསྐུར་མིན། །དེ་བཞིན་ཉན་ཐོས་འདོད་ཆགས་བྲལ་གྱུར་པ། །དེ་དག་ང་བུ་དབང་བསྐུར་འོས་མ་ཡིན། །དེ་ལྟར་དེ་དག་བདག་ལ་ཕན་ཕྱིར་བརྩོན། །བདག་གཞན་གཉི་གའི་དོན་བྱེད་
D87.044.0135a07.01