完整藏文原文 · 德格版页 当前仅加载第 44 函德格 9a 版页；藏文 NFD、目录标记与异常页序保留在来源切片中，重复版页行以稳定序号区分。
འདོར་རོ། །ལྷའི་བུ་གང་དུ་ངུར་སྨྲིག་དག་ལ་འཛིན་པའི་འདུ་ཤེས་དང་ལྡན་པ་དེ་ནི་ལྟ་བའི་རྣམ་པ་ཅན་ཡིན་པར་ཁོ་བོ་སྨྲ་སྟེ། ལྷའི་བུ་ངུར་སྨྲིག་འཛིན་པས་ནི་རྣམ་པར་དག་པ་འམ། རྣམ་པར་གྲོལ་བར་མི་འགྱུར་རོ། །དེ་ཅིའི་ཕྱིར་ཞེ་ན། ལྷའི་
D80.044.0009a01.01བུ་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་སྙིགས་མ་མེད་པ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་སྙིགས་མ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ་འདོད་ཆགས་ནི་སྙིགས་མའོ། །ཞེ་སྡང་ནི་སྙིགས་མའོ། །
D80.044.0009a02.01གཏི་མུག་ནི་སྙིགས་མའོ། །རྒྱུ་ནི་སྙིགས་མའོ། །ལྟ་བ་ནི་སྙིགས་མའོ། །མིང་ནི་སྙིགས་མའོ། །གཟུགས་ནི་སྙིགས་མའོ། །འདུ་ཤེས་ནི་སྙིགས་མའོ། །ལྷག་པར་འཛིན་པ་ནི་སྙིགས་མའོ། །མཚན་མ་ནི་སྙིགས་མའོ། །སྤྲོས་པ་ནི་སྙིགས་མའོ། །
D80.044.0009a03.01ལྷའི་བུ་གང་མི་དགེ་བའི་ཆོས་དེ་དག་ཡིད་ལ་མི་བྱེད་པ་དེ་ནི་སྙིགས་མ་མེད་པའོ། །གང་སྙིགས་མ་མེད་པ་དེ་ནི་ཅི་ཡང་མེད་པའོ། །གང་ཅི་ཡང་མེད་པ་དེ་ནི་ཉོན་མོངས་པ་མེད་པའོ། །གང་ཉོན་མོངས་པ་མེད་པ་དེ་ནི་ནམ་མཁའ་ཡིན་ནོ། །ལྷའི་བུས་སྨྲས་པ།
D80.044.0009a04.01འཇམ་དཔལ་ལྷག་པར་བྱ་བ་མེད་པ་ལྷག་པར་བྱ་བ་མེད་པ་ཞེས་བགྱི་ན། འཇམ་དཔལ་ལྷག་པར་བྱ་བ་མེད་པ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ་ལྷག་པར་བྱ་བ་མེད་པ། ལྷག་པར་བྱ་བ་མེད་པ་ཞེས་བྱ་བ་ནི་ཆོས་འགའ་ཡང་ལྷག་པར་
D80.044.0009a05.01མི་བྱ་བ་དེ་ནི་ལྷག་པར་བྱ་བ་མེད་པ་ཞེས་བྱ་སྟེ། ལྷའི་བུ་གང་དག་ལྷག་པར་བྱེད་པ་དེ་དག་ལ་དེ་བཞིན་གཤེགས་པས་ལྷག་པར་བྱ་བ་མེད་པ་ཞེས་གསུངས་ཏེ། དེ་ནི་ལྷག་པར་བྱ་བ་མེད་པ་ཞེས་བྱའོ། །ལྷའི་བུས་སྨྲས་པ། འཇམ་དཔལ་ཅི་ཞིག་ལྷག་པར་བགྱིད།
D80.044.0009a06.01འཇམ་དཔལ་གྱིས་སྨྲས་པ། ལྷའི་བུ་མཉམ་པ་ཉིད་ལས་འདའ་བར་བྱེད་ཅིང་མཉམ་པ་ཉིད་ལས་འདས་ནས་ཆོས་གང་མ་རྙེད་མི་རྙེད་རྙེད་པར་མི་འགྱུར་ཞིང་མ་འབྱུང་མི་འབྱུང་འབྱུང་བར་མི་འགྱུར་བའི་ཆོས་དེ་ལ་ལོག་པར་གནས་ཤིང་ལྷག་པར་བྱེད་དེ། འདི་ལྟ་སྟེ། བདག་
D80.044.0009a07.01