完整藏文原文 · 德格版页 当前仅加载第 40 函德格 173b 版页；藏文 NFD、目录标记与异常页序保留在来源切片中，重复版页行以稳定序号区分。
ཡང་མྱ་ངན་ལས་འདས་པ་ལ་སེམས་པ་དང་། མྱ་ངན་ལས་འདས་པ་ལ་གཞོལ་བ་དང་། མྱ་ངན་ལས་འདས་པ་ལ་འབབ་པ་དང་། མྱ་ངན་ལས་འདས་པ་ལ་བབ་པར་ཡང་བྱེད་མོད་ཀྱི། མྱ་ངན་ལས་འདས་པ་དེ་མངོན་སུམ་དུ་ནི་མི་བྱེད་དོ། །དེ་ཅིའི་ཕྱིར་ཞེ་ན། གཞི་
D53.040.0173b01.01འདིས་བདག་བྱང་ཆུབ་ལས་ལྡོག་པར་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་
D53.040.0173b02.01འདས་བདག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་བ་ལྟར་ན། བྱང་ཆུབ་སེམས་དཔའ་ནི་འཁོར་བ་ཁོ་ནར་གནས་པར་བགྱི་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བྱང་ཆུབ་
D53.040.0173b03.01སེམས་དཔའ་ནི་འཁོར་བ་ཁོ་ནར་གནས་པར་བྱ་བ་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་འཁོར་བ་ན་འཁོར་བའི་ཚེ་འཁོར་བའི་སྐྱོན་རྣམས་ཀྱིས་མི་གོས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་ཕྱིར་
D53.040.0173b04.01དཔེ་བརྗོད་པར་བྱས་ཉོན་ཅིག་རིགས་ཀྱི་བུ་འདི་ལྟ་སྟེ། དཔེར་ན་སྦྲུལ་འཛིན་པའི་མིས་གསང་སྔགས་དང་། སྨན་གྱི་སྟོབས་བསྐྱེད་པ་ཆེན་པོ་དང་ལྡན་པ་ནི་སྦྲུལ་གདུག་པ་དག་དང་། ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་པར་བྱེད་ཀྱང་གཞི་དེས་དེའི་སྲོག་གི་བར་ཆད་བྱེད་
D53.040.0173b05.01པར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཤེས་རབ་དང་། ཐབས་དང་། རིགས་པའི་གསང་སྔགས་དང་། སྨན་གྱི་སྟོབས་བསྐྱེད་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་
D53.040.0173b06.01དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་མྱ་ངན་ལས་འདས་པ་དེ་ཡང་མངོན་སུམ་དུ་མི་བགྱིད་ལ། འཁོར་བའི་སྐྱོན་དེ་དག་གིས་ཀྱང་མི་གོས་པ་ནི་བཅོམ་ལྡན་
D53.040.0173b07.01