完整藏文原文 · 德格版页 当前仅加载第 44 函德格 277b 版页；藏文 NFD、目录标记与异常页序保留在来源切片中，重复版页行以稳定序号区分。
པོ་བསམ་གྱིས་མི་ཁྱབ་པ་ཞེས་བྱ་བར་ཡང་ཟུང་ཤིག །སྨོན་ལམ་ཐམས་ཅད་སྡུད་པ་སྨོན་ལམ་ཆེན་པོ་ཞེས་བྱ་བར་ཡང་ཟུང་ཤིག །དམ་པའི་ཆོས་ཡོངས་སུ་འཛིན་པ་བསམ་གྱིས་མི་ཁྱབ་པ་བསྟན་པ་ཞེས་བྱ་བར་ཡང་ཟུང་ཤིག །ཐེག་པ་གཅིག་ཏུ་ཡང་དག་པར་འདུ་བ་བསྟན་པ་ཞེས་བྱ་བར་ཡང་ཟུང་ཤིག །
D92.044.0277b01.01འཕགས་པའི་བདེན་པ་བརྒྱད་བསྟན་པ་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པའི་སྙིང་པོ་བསྟན་པ་ཞེས་བྱ་བར་ཡང་ཟུང་ཤིག །ཆོས་ཀྱི་སྐུ་བསྟན་པ་ཞེས་བྱ་བར་ཡང་ཟུང་ཤིག །སྟོང་པ་ཉིད་ཀྱི་དོན་གྱི་དགོངས་པ་ཡང་དག་པར་བསྟན་པ་ཞེས་བྱ་བར་ཡང་ཟུང་ཤིག །བདེན་པ་གཅིག་ཏུ་བསྟན་
D92.044.0277b02.01པ་ཞེས་བྱ་བར་ཡང་ཟུང་ཤིག །རྟག་པ་དང་། བརྟན་པ་དང་། ཞི་བ་དང་། ཐེར་ཟུག་པ་དང་། སྐྱབས་གཅིག་ཏུ་གྱུར་པ་བསྟན་པ་ཞེས་བྱ་བར་ཡང་ཟུང་ཤིག །ཕྱིན་ཅི་ལོག་གིས་བསྟན་པ་ཞེས་བྱ་བར་ཡང་ཟུང་ཤིག །རང་བཞིན་གྱིས་ཡོངས་སུ་དག་པའི་སེམས་ལ་དགོངས་པ་བསྟན་པ་ཞེས་བྱ་བར་ཡང་ཟུང་ཤིག །
D92.044.0277b03.01དེ་བཞིན་གཤེགས་པའི་སྲས་ཀྱི་ཡང་དག་པ་བསྟན་པ་ཞེས་བྱ་བར་ཡང་ཟུང་ཤིག །ཀཽ་ཤི་ཀ་འདི་ནི་ལྷ་མོ་དཔལ་ཕྲེང་གི་སེང་གེའི་སྒྲ་ཞེས་བྱ་བར་ཡང་ཟུང་ཤིག །ཀཽ་ཤི་ཀ་མདོ་འདིར་བསྟན་པ་གང་དག་བཤད་པ་དེ་དག་ཐམས་ཅད་ནི་རྒྱུ་བ་བཅད་པ་དང་། ངེས་པའི་དོན་དང་། རྟོན་པ་གཅིག་པ་ཞེས་བྱ་བར་ཡང་ཟུང་ཤིག །ཀཽ་ཤི་
D92.044.0277b04.01ཀ་ལྷ་མོ་དཔལ་ཕྲེང་གི་སེང་གེའི་སྒྲ་བསྟན་པའི་ཆོས་ཀྱི་རྣམ་གྲངས་འདི་ནི་ངས་ཁྱོད་ཀྱི་ལག་ཏུ་གཏད་ཀྱིས་འཇིག་རྟེན་ན་དམ་པའི་ཆོས་ཇི་སྲིད་གནས་པ་དེ་སྲིད་དུ་ཕྱོགས་བཅུའི་འཇིག་རྟེན་ཐམས་ཅད་དུ་ཡང་དག་པར་སྒྲོགས་ཤིག །སྟོན་ཅིག །ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བཅོམ་ལྡན་
D92.044.0277b05.01འདས་ཀྱི་སྤྱན་སྔར་ཆོས་ཀྱི་རྣམ་གྲངས་འདི་བཟུང་ཞིང་ཀུན་ཆུབ་པར་བྱས་ནས་ལྷའི་དབང་པོ་བརྒྱ་བྱིན་དང་། ཚེ་དང་ལྡན་པ་ཀུན་དགའ་བོ་དང་། གཞན་ཡང་གང་དེར་འདུས་པར་གྱུར་པ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །
D92.044.0277b06.01འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་དཔལ་ཕྲེང་གིས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
D92.044.0277b07.01